本地時裝品牌Still House今年踏入第5個年度，憑著簡約城市風格、精緻造工及堅持採用高品質材料，如今已樹立獨當一面嘅品牌形象。而近年佢地更積極將整個生產線設定喺香港製造，並與唔同嘅創作單位及設計師合作，希望宣揚本地時裝品牌嘅價值。

而認同Still House理念嘅多棲創作人Juno 麥浚龍，一向都對文化藝術獨具慧眼，特別於時裝上就更加考究，因此與Still House可以話一拍即合，並連同其個人品牌Kamonuj進行Crossover合作，而今個季度更換黎本地製衣廠牌老字號 - 利工⺠織造廠加入。

利工⺠作為香港本地老牌子，一向以製作內衣聞名，其線衫及羊毛衫更於7、80年代間一度揚威到海外，係本港是寥寥可數留得下來嘅百年品牌。

而今次三方難得合作，各自有著自己嘅角色，其中Juno就係計劃嘅創意總監，Still House則係負責設計今次聯乘產品，而利工民則負責生產程序。

今次負責生產嘅利工民，其經典產品相信絕對係「秋蟬牌羊毛內衣」，而是次聯乘活動嘅上品款式就係以秋蟬牌傳統半鈕扣 Henley Neck短袖汗衫為藍本，並加入現代元素改良至適合於秋季⻑袖款式名為“The Code” Henley，用上32支精梳⻑絨棉製作，質感柔軟，半開領位置由三粒塑膠鈕扣縮短至兩粒牛角鈕並加上100% Silk Tapping襯托加強質感，衫腳更加上繡有Still House X Kamonuj name tag，新舊融合完全已經唔係單純一件內衣咁簡單！