近年Johnny Depp因離婚及家暴醜聞慘遭封殺，除咗失去《怪獸與牠們的產地 3》演出機會，最新主演電影《Minamata（毒水曝光）》亦遲遲未能喺美國上映。佢近日出席西班牙《聖塞瓦斯蒂安影展》接受終身成就獎（Donostia Award），被記者問到點睇近年盛行嘅「封殺文化（Cancel Culture）」，身為過來人嘅Johnny Depp就表示情況已經失控，在座冇人係安全，分分鐘一句說話就惹嚟抵制...

（圖片截自：Variety via AP）

封殺文化/取消文化（Cancel Culture）泛指公眾人物因為作出「唔恰當」嘅言論或行為，而遭到社會大眾輿論抵制，導致工作機會、商業代言、企業贊助通通都「被取消（Cancel）」，而呢類「唔恰當」嘅言論通常同種族歧視、性別歧視、具爭議嘅觀點有關。例如《哈里波特》作者JK羅琳就曾經因為歧視「跨性別者」言論而被網民抵制，甚至引嚟哈利波特演員Daniel Radcliffe公開批評。一直以嚟都有唔少人爭論呢種「封殺文化」是否「正確」，究竟係屬於「罪有應得」定抑或係限制言論自由，令大家唔敢暢所欲言。

《Minamata》劇照（圖片截自：IMDB）

回歸返Johnny Depp嘅睇法，當佢被記者問到點睇近年愈演愈烈嘅「封殺文化」，佢就表示「呢股風潮已經足以成為歷史事件，無論呢種文化會持續幾耐都好，呢種倉促判斷行為依家已經失晒控。我可以向在座每一位保證，冇人可以逃避呢股風潮，只要講錯一句說話，區區一句說話，就可以令你毫無立足之地。呢樣嘢唔單只發生喺我身上，亦都會發生喺其他人身上，不分男女老幼都有機會遇到。遺憾嘅係，有啲人會覺得呢種行為係正常。」

Johnny Depp繼續表示「雖然我相信冇人係安全，但我同時深信只要用真相武裝自己，就算世人嘅睇法（審判）可能會剝奪某種藝術創作權，都唔再重要。只要世上出現不公義嘅事，無論係針對你、你所愛嘅人、你所相信嘅人，都應該勇敢挺身而出，千祈唔好坐視不理，因為佢哋需要你嘅支持。」