近幾年非常強調環保嘅Apple，繼上年宣布iPhone 12唔跟叉電器後，今年推出嘅iPhone 13就表示唔用膠膜包裝，以減少600公噸塑膠使用量。消息傳出後唔少人都非常好奇究竟會係咩包裝，總唔會乜封裝都冇，可以直接打開個盒啩？近日網上就有人流出新包裝照片，從舊有嘅膠膜變成一條撕拉式紙質封條，唔知大家有咩睇法呢？

從流出嘅照片可以見到，今次iPhone 13系列嘅包裝盒真係冇咗層「包膠」，改用一條紙質封條封住開口處，用家只需要按箭咀方向輕輕撕開就可以打開包裝盒。對於呢個新設計，有網友就認為呢種包裝好容易被「別有用心」嘅無良商家偷龍轉鳳，但如果真係要換貨嘅話，過往嘅膠膜封裝應該更容易造假？

除咗怕有無良商家會偷龍轉鳳之外，新包裝另一個隱憂可能係運送過程時整污糟/刮花包裝盒，又或者落雨嗰陣唔小心整爛包裝盒等等。