可以話係一代人童年回憶嘅經典遊戲《Age of Empires 世紀帝國》，最新一集即將於10月28日正式發售，官方亦喺上個月搞咗一次封測活動，不過抽唔中嘅朋友都唔使太傷心，事關官方即將喺今個周末（香港時間18/9 1:00 am至21/9 1:00 am）展開技術壓力測試，顧名思義就係邀請全球玩家一齊試玩，直到佢個Server頂唔順為止，而且完全免費仲可以連機對打！見今個周末好似會落大雨，不如宅一下搵埋班朋友一齊「伐伐伐伐伐伐木工」。

官方表示今次測試係為正式發售做好準備，試下Server可以承受到幾多人一齊玩，所以希望愈多人參加愈好。屆時玩家可以率先體驗教學關卡、多人對打以及打AI電腦，總共有中國、英國、神聖羅馬帝國以及阿拔斯王朝4個文明，同埋5張地圖可以玩。

想參加今次測試亦非常簡單，唔使預購遊戲，只要到Windows 10嘅Microsoft Store或者喺Steam撳個掣申請「Technical Stress Test」，之後等Email通知就得。