Facebook及Ray-Ban於今日凌晨正式發布首款聯乘智能眼鏡「Ray-Ban Stories」，外型低調樸實不浮誇，但就支援影相拍片、傾電話、聽音樂等多個功能，以第一人稱視覺分享所見所聽。

今次Facebook聯乘Ray-Ban以旗下50年代標誌款式Wayfarer及Wayfarer Large為藍本，設計出型格功能兼備智能眼鏡，重量只係比原本嘅Ray-Ban Wayfarer多5公克。眼鏡搭載兩個500萬像素鏡頭支援第一身視角影相拍片，用家只要講一聲「hey facebook」就可以即時喚醒拍攝功能。可能你會擔心咁咪好容易被人偷拍？呢方面官方就話鏡頭啟用時旁邊嘅LED燈會亮起，以提示周圍嘅人拍緊片。

另外，Ray-Ban Stories亦配備開放式喇叭及收音咪，用戶能夠直接透過眼鏡傾電話或聽音樂，鏡架上亦有觸控板可以作出播放/暫停、音量調較等指令。官方標榜眼鏡內置電池有6個小時續航力，若果搭配埋充電盒（眼鏡盒）就可以用三日（以每日使用6小時計算），而且用戶可以自由搭配遮陽、漸變、全視線、近遠視或無度數鏡片。

Ray-Ban Stories售價為299美起（約$2,320港幣），今日起於美國、澳洲、加拿大、愛爾蘭、意大利、英國率先發售。