由於成本以及產量需求，好多時廠商推出嘅人偶都未能還原得十全十美，最近日本就有位女模型迷，透過高超塗裝技巧將心儀角色還原成漫畫畫風，令網友們睇到相當驚訝。

呢位唔露面嘅高手叫做「MAマン」（Twitter@M_A_paintman），因為兩年前去秋葉原嗰陣偶意見到一件重新塗裝嘅作品令佢眼界大開，了解到原來有呢個流派，加上佢自己就讀藝術學校主修油畫，所以就開始嘗試親身製作，至今已製作出40多件作品。

據「MAマン」所講，每件作品快則要用上1個禮拜，慢則需要1個月時間，而且佢有時會一日畫成8個鐘。比起真係落筆畫，佢就表示其實更多時間花喺考慮用咩顏色，希望重現角色之餘又唔會破壞原作。另外，佢仲開咗Youtube Channel教大家塗裝同分享心得，有興趣嘅朋友可以了解一下。