外國收藏品網站Rally日前以200萬美金，即大約1560萬港元售出一盒1985年推出、從未開封嘅紅白機《Super Mario Bros.》遊戲盒帶，創出同類收藏品嘅最高價格。

隨住以往嘅「窮機迷」慢慢長大而且有財力補完「童年缺憾」，近年舊遊戲盒帶嘅交易價格不停創新高。而據《New York Times》報導，收藏品網站Rally日前就向一位匿名買家，以200萬美金價格售出一盒從未開封嘅1985年《Super Mario Bros.》遊戲盒帶，打破7月中由一盒《Super Mario 64》創下嘅156萬美金 (約1200萬港元) 紀錄，成為有史上來最高售價嘅遊戲。

特別值得一提嘅係，2020年7月時嘅「最高售價遊戲」紀錄只係11.4萬美金 (同樣係一盒1985年《Super Mario Bros.》，換言之喺一年之內嘅紀錄推高咗近20倍。

另一樣值得留意嘅係，Rally並非傳統拍賣網站，其機制係Rally先購買罕有物品，然後開放大眾以類似買股份嘅方式「投資」，假若物品成功賣出，大眾就按「股份」比例分配收入。算係容許本身冇收藏、又冇足夠財力嘅人參與其中。

資料來源：New York Times