今年91歲嘅Clint Eastwood（奇連伊士活），當年憑住主演《A Fistful of Dollars（獨行俠連環奪命槍）》以及《Dirty Harry（辣手神探奪命槍）》系列，成為60、70年代家傳戶曉嘅荷里活巨星。不過佢並冇因此而滿足，後來更自導自演斬獲多座奧斯卡金像獎，即使91歲高齡仍無減佢對電影嘅熱情。最近佢自導自演新作《Cry Macho》曝光首條預告片，Clint Eastwood將再次扮演牛仔，同一位年青人展開一段艱辛旅程，最後互相獲得救贖。

《Cry Macho》故事設定喺1979年，講述過氣牛仔Miko（Clint Eastwood飾）受到前老闆委託，前往墨西哥帶佢個仔返美國，旅程途中兩人面臨各種意想不到嘅挑戰，最後Miko喺教導小男孩點樣成為一個好人期間，自己亦得某種救贖。

電影改編自N. Richard Nash於1975年創作嘅同名小說，歷年嚟有唔少製作人都打算翻拍成電影，當年更搵過Arnold Schwarzenegger（阿諾舒華辛力加）商討演出，不過因為種種原因最後都成唔到事，直到上年Clint Eastwood先宣布接手製作，預計今年9月17日於北美戲院/HBO Max同步上映。