近日《EVA》導演庵野秀明於線上活動「Comic-Con@Home 2021」大談今後計劃，表示原本打算用8年時間拍完《福音戰士新劇場版》系列，點知最後花咗16年時間，依家暫時唔想再掂動畫，打算之後製作幾部同《EVA》無關嘅真人電影。唔知佢又諗住拍咩「真·」系列呢？

（圖片截自：Youtube@Comic-Con International）

庵野秀明於訪問表示，佢作品嘅目標觀眾係生活喺日本嘅人，但能夠受到全世界影迷喜愛，覺得非常榮幸同感激。經歷長年《福音戰士新劇場版》製作後，現時61歲嘅庵野秀明打算暫時離開一下動畫世界，將心力投入真人電影作品，期望可以透過真人電影呈現一啲動畫無辦法做到嘅事，不過目前只係構思階段，尚未有具體計劃。

今年61歲嘅庵野秀明本身係一名動畫師，曾經係宮崎駿學生，參與過《風之谷》、《超時空要塞 可有記起愛？》、《無限地帶23》製作，後來以《新世紀福音戰士》奠定動畫巨匠地位。近年轉向拍攝真人電影，曾執導過《甜心戰士》真人版電影以及《真·哥斯拉》，而新作《新·超人》同《新·幪面超人》亦即將喺今年以及2023年上映。