先前我哋就同大家報導過Netflix打算進軍電玩界，並已聘請前EA及Facebook高層Mike Verdu過檔做遊戲開發副總裁。事情最近又有新進展，根據Netflix剛剛公布嘅第二季度財報，佢哋打算先集中喺手機遊戲開發，而且現有訂閱用戶無須額外付費即可享用！

（圖片截自：screenrant）

Netflix喺財報入面提到，公司已經製作原創劇集及電影將近10年，係時候去了解會員們會點睇遊戲內容。佢哋會將遊戲視為一個全新嘅內容類別，同原創電影、動畫、電視節目睇齊，並基於先前嘅互動式電影《Black Mirror: Bandersnatch（黑鏡：潘達斯奈基）》以及《Stranger Things》遊戲版為經驗開發更多遊戲作品。目前主要針對手機及平板流動市場，不過都唔排除將來會推出埋家機、甚至PC級別嘅遊戲。

Netflix原創劇集《Stranger Things》曾改編成手機遊戲。

根據Netflix數據，目前全球大約有2.09億付費訂閱用戶，加上佢哋請到遊戲界高人Mike Verdu幫手開發，以及坐擁大量可以改編成遊戲嘅自家影視內容，所以外界都睇好Netflix將會突破影視媒體樽頸，嘗試走向全新領域將遊戲整合於影視作品當中。