由吾峠呼世晴老師創作嘅大熱動漫《鬼滅之刃》雖然已經圓滿結束，但炭治郎、禰豆子等人嘅故事就未完！因為由8月號開始，同為集英社旗下嘅《最強Jump！》就會開始連載《鬼滅學園》！

所謂《鬼滅學園》，其實係源自附送於《鬼滅之刃》單行本卷末嘅四格漫畫中，名為「中高一貫!!キメツ学園物語」嘅衍生作品。簡單講就即係將《鬼滅》嘅人物設定放於日本中學環境嘅輕鬆日常故事，所以主角都係炭治郎、禰豆子等人，而非《鬼滅之刃》最後嘅「後代們」。而吾峠呼世晴老師亦為今次連載畫咗張祝賀圖。

《鬼滅學園》將由曾經奪得「JUMP寶物新人漫畫賞 審查員特別獎」、曾於《少年Jump！》上連載《獄卒火久摩 (獄丁ヒグマ)》嘅帆上夏希執筆。並於最近由雙週刊改成月刊嘅《最強Jump！》上連載。