有唔少PC同Console玩家都會笑玩手機遊戲嘅人，認為用電話打機根本冇咩「遊戲體驗」，而且好多手機遊戲都會間接迫人課金。不過笑還笑，手機遊戲市場規模確實非常龐大而且商機滿滿，最近市場調查機構Sensor Tower發表最新報告，指出2021年上半年度App Store及Google Play全球大收649億美元，當中有447億（約7成）係嚟自手機遊戲消費。而最暢銷手機遊戲前三位，就分別由騰訊旗下嘅《王者榮耀》、《絕地求生M》，以及中國遊戲公司米哈遊嘅《原神》獲得。

（圖片截自：Sensor Tower）

可能受到疫情影響，大家都少咗出街多咗打機，無論App Store定Goolge Play嘅遊戲收入都比去年同期有所增長，App Store就上升咗13.5%，而Google Play就上升咗24.7%。雖然Google Play嘅遊戲收入升幅較高，但整體收入都少過Apple Store，唔通iOS用家比較容易課金？

（圖片截自：Sensor Tower）

如果以暢銷遊戲排名嚟睇，就可以見到前三名，以及第8名嘅《萬國覺醒》都係中國發行商，當中排名第一嘅《王者榮耀》就喺短短半年內賺咗超過15億美元，而緊隨其後嘅《絕地求生M》亦大收近15億美元。由於以上數字只係單純統計App Store同Goolge Play平台收入，並未反映到嚟自中國或其他地區嘅第三方Android應用商店收入（因為中國用唔到Google Play，大部份中國Android用戶會用「360手機助手」、「oppo應用商店」等等嘅平台Down Apps），相信如果計埋其他Android應用商店條數，實際收入將會更加驚人。唔知呢條數大家又有冇份「貢獻」呢？