《GTA 5》自2013年推出至今將近8年，人氣依然高居不下，橫跨三代主機由PS3一路紅到去PS5，其線上版《GTA Online》更每日有10萬名玩家上線。雖然Rockstar Games一直對下代作品《GTA 6》守口如瓶，但我哋都可以從各位「可靠」知情人士了解最新情報，近日著名爆料人Tom Henderson透露，《GTA 6》除咗會重返Vice City（VC）之外，地圖亦會隨住DLC及更新而不斷擴張，同時會加入一位天才黑客女主角。

著名業內爆料人士Tom Henderson透露，考慮到將來《GTA 6》都要推出Online模式吸金，新作時空背景並唔會係外界盛傳嘅80年代，反而係現代化Vice City，地圖將會隨住DLC更新以及大型劇情事件而「擴張」同「進化」，唔再似之前嘅作品咁悶，永遠一式一樣。

《GTA VC》地圖。

另外，《GTA 6》亦會保留舊有嘅多主角玩法，並且今次將會加入一位聰明女黑客，將會喺主線劇情負責hacking以及網絡技術有關嘅任務。（唔知女角又有冇得嫖妓呢？）

可惜嘅係，Tom Henderson表示新作只會喺次世代主機及PC平台推出，考慮到目前主機短缺，加上Rockstar非常關注員工福祉，唔畀佢哋OT或過份操勞，《GTA 6》至少要到2024-2025年先會正式發售。不過有一個好消息，就係Rockstar唔似其他公司（你估下邊間？）會不斷推遲發售日期，確實隻Game100%製作好先會公布具體發售日期，唔會令機迷空歡喜一場。

雖然有關消息純屬傳聞，仍未得到官方證實，但考慮到Tom Henderson係遊戲界著名爆料人士，曾經多次講中《Battlefield（戰地風雲）》及《Call of Duty（決勝時刻）》情報，最近佢就講中最新一集Battlefield叫《Battlefield 2042》，所以都可以信下嘅。佢早前亦透露《GTA 6》將會喺遊戲加入加密貨幣系統（注意：唔係現實嘅加密貨幣），等玩家可以喺Game除咗炒股票仲可以炒埋幣。