《黄金魂》白羊處女神聖衣實物現身

文：MenClub Patrick　　圖：互聯網
POSTED ON 25 Mar 2015

上個禮拜報道咗《聖闘士星矢-黄金魂》將於4月11日首播，兼且有埋白羊座同處女座兩件有翼聖衣神話嘅官圖流出。雖然動畫製作單位對好多嘢仲係神神秘秘，但係搵錢至上嘅「笨大」就話之你，總之劇透得幾多就幾多。呢排佢又喺日本搞咗個小型預展，將所有新舊黃金聖衣嘅聖衣神話EX晒冷，最矚目當然係畀大家見到白羊座同處女座兩件神聖衣嘅實物啦！終於叫得呢兩件有翼聖衣做神聖衣喇，雖然大家都估到，但今次「笨大」直頭喺介紹牌度爆埋出嚟。小編個人幾鍾意處女座神聖衣嘅星座形態，成座日式觀音像咁款，只可惜今次冇實物睇。

呢個預展仲連劇情都劇透咗少少出嚟，因為入面有個情景係三個着住神聖衣嘅黃金聖鬥士企喺阿斯格特奧丁像前面，而動畫條新trailer入面，亦都有呢個場景，即係話今次套動畫，好可能係以黃金聖鬥士對奧丁嘅新地上代行者（trailer見到係男人嚟，唔係希蒂女皇）為故事骨幹，唔係之前傳又係打冥王咁悶。
12黃金捨身打爆嘆息之牆呢個咁經典嘅場面，不停出現喺《黄金魂》嘅唔同trailer，今次「笨大」又再砌番呢個情景出嚟，睇嚟新動畫應該都會涉及呢一個情節。