近日《鋼之鍊金術師》作者荒川弘將舊作《RAIDEN-18》連載內容輯錄成全新單行本發售，但中國網民最關心就唔係漫畫劇情，而係挖出10年前出版嘅「第三話」惡搞毛澤東一幕翻舊帳，炮轟荒川弘辱華。面對輿論壓力，荒川弘唔單只冇道歉，更企硬表示當年「那個國家」太多《鋼鍊》盜版，正版幾乎賣唔出，所以先用呢種方法打算擊退盜版。中國網民聽到當然更加扯火，繼續喺微博聲討作者，唔知單嘢可以點收科呢？

《RAIDEN-18》自2005年起喺漫畫雜誌《月刊Sunday Gene-X》不定期連戴，16年嚟只有4話，故事講述一位鍾意改造屍體嘅瘋狂科學家立花博士，用收集返嚟嘅屍體製作出人造人「RAIDEN-18」，由於兩人性格差異太大而搞出唔少笑料。本身套漫畫都無咩嘢嘅，只係一套普通搞笑短篇漫畫，但就因為作者喺2011年出版嘅「第三話」將毛澤東畫成殭屍，並佢頭上貼上「敕令廁所在哪裡呢？」符咒，而且隻殭屍仲會不停叫喊「大躍進！大躍進！」，所以觸動到中國網民神經，認為荒川弘惡搞前領導人並諷刺中國廁所少，繼而炮轟佢辱華。

面對輿論壓力，荒川弘近日喺《月刊Sunday Gene-X》訪問表示，由於當年畫緊第三話嗰陣，眼見「那個國家」有好多《鋼鍊》盜版，正版幾乎賣唔出，令佢非常困擾，所以先畫一啲唔會喺「那個國家」出現到嘅漫畫，打算嚇走盜版。中國網民聽完當然更扯火，紛紛表示「噁心」、「失望」。有人就認為盜版問題係事實，作者辱華都係事實，一單還一單，辱華就係辱華。唔知件事最後可以點收科呢？