早前《Cyberpunk 2077》開發商CD Projekt Red（CDPR）慘遭黑客入侵，偷出大量遊戲未公開內容以及公司內部文件，由於CDPR堅拒交付贖金，近日黑客就將所有資料公諸於世。有眼利嘅網友就發現《Cyberpunk 2077》原始碼原來暗藏一系列審查用標籤，例如色情、血腥、毒品等等，不過最有趣嘅係CDPR竟然用「WinnieThePooh（小熊維尼）」代稱中國專用審查標籤，唔通CDPR今後要絕跡於中國市場？

（圖片截自：reddit）

當黑客公開所有資料後，隨即引嚟一眾充滿好奇心嘅網友下載檢閱，有Reddit網友就發現《Cyberpunk 2077》原始碼好多可疑嘅地方，當中就包括色情、裸露、毒品、血腥等等審查用嘅標籤，其中針對中國審查專用嘅標籤，竟然用上「WinnieThePooh」，又可能驚其他同事唔知咩嚟，所以附上「China」一字做註解。

其實CDPR都唔係第一次涉嫌「辱華」，由於《Cyber​​punk 2077》故事係基於一套名為《Cyber​​punk 2020》嘅Board Game改編而成，而根據《Cyber​​punk 2020》背景設定，台灣定義為一個獨立國家。當時就有中國網友喺微博大肆宣揚遊戲「辱華」，並指有骨氣嘅中國人應該罷玩抵制，不過就冇法撼動各位中國機迷對《Cyber​​punk 2077》嘅期待，更有網友反過嚟叫大家要自信，遊戲歸遊戲，唔好成日自卑帶風向，最終成功渡過「辱華」風波。

雖然《Cyber​​punk 2077》冇喺中國上架（中國玩家玩嘅都係水貨或翻牆下載），但CD Projekt（CDPR母公司）一直同中國保持良好關係。之前台灣遊戲《還願》就因為遊戲內一張符咒圖片暗藏「小熊維尼」而被指影射中國領導人及辱華，隨即遭到中國全面封殺。當時CD Projekt旗下遊戲平台GOG都好「識做」咁將《還願》即時下架以示尊重。唔知今次原始碼事件，CD Projekt又會點樣拆呢？如果冇合理解釋，或者會同《還願》下場一樣，絕跡於中國市場。