喺《Iron Man》飾演「Pepper Potts（小辣椒）」嘅美國女星Gwyneth Paltrow，其自家生活品牌Goop周不時就會推出一啲奇怪產品。繼「陰道能量石」同「防心靈吸血鬼噴霧」後，近期就出咗一款名為「我的陰道味（This Smells Like My Vagina）」香氛蠟燭，唔知各位係出於好奇定係特別喜好，上架短短幾個鐘就賣晒。不過最近就有買家反映蠟燭會爆炸，起訴Goop並要求賠償500萬美元。

據dailymail報導，美國德州一名48歲男子Colby Watson，點著「我的陰道味」香氛蠟燭唔夠3個鐘就發生爆炸，搞到成間房都係煙，裝著蠟燭嘅玻璃杯雖然冇爛到，但就成個燒到燶晒。Colby Watson表示爆炸燒爛咗佢成個床頭櫃，認為蠟燭設計或製造有缺陷，對買家構成安全威脅，隨即告上法庭要求Goop賠償500萬美元。

（圖片截自：dailymail）

雖然Goop網站上有警告蠟燭唔可以燃點超過2小時，並要求蠟燭遠離易燃物件。但Colby Watson同佢嘅律師就認為標示警告性不足，並冇提及蠟燭長時間燃點，可能對用家造成嚴重傷害，至於邊個先啱就留返畀法官審啦。

相信大家都會好奇呢件香氛蠟燭究竟係咩味，《Jimmy Kimmel Live》主持人就曾經邀請過Gwyneth Paltrow上節目，並即場開箱佢件得意之作。Jimmy索咗幾索之後，就失望咁話蠟燭好香，有一種好有男性氣息嘅木味。Gwyneth Paltrow就尷尬回應件蠟燭不竟唔可以真係似陰道嘅氣味，只係希望提醒女生們要自信。換言之，「陰道味香氛蠟燭」只不過係一個噱頭。

資料來源：dailymail