早前Sony就收購全球最大格鬥遊戲電競賽事EVO（Evolution Championship Series），向玩家展示踏足電競界決心。最近Sony就曝光一份專利，似乎暗示佢哋唔單只搞電競，仲打算搞埋博彩平台，讓觀眾能夠實時對電競賽事落注，並支援用加密貨幣做籌碼。

根據專利數據庫patentscope資料，Sony早於2019年就申請咗呢份名為「E-SPORTS BETTING PLATFORM」（電子競技博彩平台）嘅專利，只係最近先公布出嚟。顧名思義，即係可以畀觀眾對電競賽事落注，除咗可以用真實貨幣，觀眾更可以用加密貨幣或遊戲貨幣做籌碼。

至於賠率方面，該系統會透過機器學習方法，參考玩家或電競隊伍過往數據，例如某個玩家過往用手榴彈殺死過幾多人、贏過幾多場比賽等等，再用一套演算法計算出賠率，就連比賽長度或玩家幾多分鐘內獲勝都有得賭，而且支援好友之間自定賠率開盤打賭。

不過就同Sony其他專利一樣，就算申請咗都唔代表必定會實現，只能夠話Sony有相關嘅諗法。但考慮到Sony咁大決心收購咗EVO，話唔定第時大家都可以坐喺電腦/電視面前賭電競賽事，同時又可以打擊外圍賭博市場。

資料來源：patentscope、screenrant