為鼓勵民眾接種疫苗，美國俄亥俄州早前宣布，只要接種至少一劑疫苗，就可以參100萬美元抽獎活動，而18歲以下嘅接種者更有機會獲得4年大學獎學金，包學費、住宿費及書簿費。活動將由5月26日開始實行，每個禮拜會抽出一位幸運兒，為期五周。

俄亥俄州州長Mike DeWine表示，隨著俄州相關防疫措施將於6月2日解禁，希望能夠透過抽獎方式鼓勵民眾盡快完全疫苗接種。由於獎金嚟自聯邦政府疫情救濟基金，所以就引嚟民主黨議員Emilia Sykes批評做法浪費公帑，認為啲錢應該用喺更有意義嘅地方。對此，州長Mike DeWine就表示理解Emilia Sykes顧慮，但就認為真正浪費公帑係大量疫苗無人接種，所以先出此下策。

（圖片截自：businessinsider）

除咗俄亥俄州之外，美國各地亦分別推出唔同獎勵鼓勵民眾接種疫苗，例如路易斯安娜州紐奧良市，就宣布「1 shot for 1 pound」，接種疫苗就可獲得1磅小龍蝦。而部份底特律居民完成接種就可獲得$50美元扣帳卡（Debit Card）作為獎勵。

資料來源：businessinsider、news5cleveland