蜜蜂與人類生活息息相關，對地球生態舉足輕重，倘若蜜蜂消失，全球更會迎來一場生物大滅絕。最近荷蘭科學家就嘗試透過蜜蜂幫助人類戰勝疫情，訓練出能夠檢測肺炎病毒嘅蜜蜂，只要將檢測樣本畀班蜜蜂「聞一聞」，幾秒鐘內就知道結果！

近日荷蘭瓦赫寧恩大學（Wageningen Universit）科學家運用「古典制約（classical conditioning）」原理訓練咗150隻蜜蜂，當蜜蜂「聞」到受感染樣本嗰陣就畀糖水佢作為獎勵，相反「聞」到未受感染樣本嗰陣就無任何獎勵。經過多次反覆訓練，最終蜜蜂只要「聞」到受感染樣本就會自發性伸出舌頭以為有糖水食，從而得知樣本有冇病毒。

研究人員表示，根據過往研究，肺炎病毒會令感染者體液氣味產生變化，所以就從氣味入手研發新檢測方法。而擁有超強嗅覺嘅蜜蜂，觸角上多達170個氣味受體，好容易喺短時間內訓練佢哋識別一種特殊氣味。認為新檢測方法平得嚟又快速，對缺乏檢測試劑嘅國家好有幫助。