相信我地唔少讀者都一定鍾意打機，但係唔係人人都有好多時間打，同時世界上都有好多人有呢個煩惱，因此「掛機」/ 放置型嘅Game就應運而生，電腦AI自行幫你做任務、升Lv，咁當你再得閒玩嘅時候都唔會落後人地好多。

而近日有發現SONY申請左一個新專利「game play profile」，就係透過AI人工智能學習玩家對該遊戲嘅風格並接手自行操作，只要你選擇自動模式，玩家就唔使再自己玩，電腦會幫你搞掂晒，升LV過關無難度。

相信睇到呢個新專利，唔少人都會覺得，咁玩黎做乜....不如睇人打機啦，又或者向好個面諗，當你真係唔好彩咁卡關嘅話，呢個AI功能就可能可以幫你順利過關，咁就唔使怕打唔爆機啦。