大約一個月前，Sony突然宣布要關閉PSP、PS3及PS Vita線上商店，換言之玩家們無辦法再買數位版遊戲。今日Sony就「認衰仔」出聲明話做錯決定，表示會繼續營運PS3及PS Vita線上商店，而PSP線上商店功能就按原定計劃於今年7月2日退役。

Sony Interactive Entertainment CEO Jim Ryan 於聲明表示，經過佢哋進一步反思後，發現當初決定顯然不正確。最初決定關閉舊裝置線上商店，係希望可以集中資源喺大多數玩家上，但後來發現原來有好多人希望繼續購買PS3同PS Vita嘅經典遊戲，所以撤回決定。

其實Sony宣佈要關閉PSP、PS3及PS Vita線上商店嗰陣，已經即刻引嚟全球各地多位粉絲反對，認為CEO Jim Ryn只係關心賺錢，無考慮到老遊戲玩家們嘅感受，並發起聯署要求Sony炒佢魷魚。唔知今次撤回咗3分之2決定（PSP線上商店仍會按原計劃退役），一眾老遊戲玩家又收唔收貨呢？

資料來源：playstation