有返咁上下「機齡」嘅朋友，仲記唔記得當年同一班同學仔去網吧打AOE呢！玩到合埋眼都識用所有快捷鍵，並且背晒所有戰術流程，「封快肉馬」、「城快馬爆」通通都無難度。等咗咁多年，《世紀帝國 Age of Empires》系列第4部作品終於有實機片段睇，唔知大家睇完又期唔期待呢？

從片中可以見到，《世紀帝國IV》遊戲畫質比歷代作品提升咗唔少，無論場景地貌，定係建築物都非常真實，令戰鬥場景更氣勢磅礡。除咗見到各個文明嘅專屬兵種，攻城戰部份亦相當有新意，城牆唔再只係一道「牆」，啲兵仔可以企埋喺上面射箭對抗入侵者。如果攻城方唔帶攻城車或遠攻單位，分分鐘未打爛道牆就已經被城牆上嘅弓兵滅團。所以小弟推測今代可能比較講求多元化兵種配合，唔似以前大家只要玩死某隻兵種就可以打天下，不過實情係點就要隻GAME出咗先知。

根據官方介紹，遊戲初上市嗰陣將會有8個文明，目前已經公開咗其中4個文明詳情，包括中國、蒙古、英國及德里蘇丹國（Dehli Sultanate）。每個文明各有特點，例如中國有「朝代」功能，按照唐宋明清時代將會有唔同建築物及單位。而英國除咗有大家熟悉嘅長弓兵，防禦建議方面將會更強大，村民亦有較強嘅基礎攻擊力，有效抵抗早期騷擾。作為遊牧民族嘅蒙古，遊戲早期就可以起馬廄，而且城鎮中心可以直接「打包」移動，盡顯遊牧文明特色。

至於單人戰役方面，官方目前透露將會有4個史詩戰役，令玩家可以重溫歷史傳說。例如AOC2 （即係征服者入侵）嘅「征服者威廉」故事，今次將入更深入探討威廉點樣進行諾曼征服，以及後續戰爭。

遊戲預計於今年秋季登陸Windows Store、Steam及Xbox Game Pass。不過售價方面就暫時未公布，有興趣讀者敬請留意。

資料來源：ageofempires