大家今日被人玩咗未呢？愚人節作為全球節日，每逢到咗4月1號，無論大企業定係朋友之間都會整蠱下大家應節，如果只係搞下GAG確實無傷大雅，但有時玩大咗，分分鐘引起公眾恐慌。大家記唔記得18年前嘅今日，香港正值沙士時期，有個中學生整咗單假新聞指香港已經成為疫埠，隨即引發公眾恐慌，紛紛去超市掃貨，最終搞到政府要開記招澄清。同日，一代巨星張國榮死訊傳出，當時大家仲以為係愚人節惡作劇，直到多個媒體實證後，先發現並唔係講笑。大家喺愚人節被玩或許玩人就多，但你又知唔知愚人節由來係咩？

愚人節由來有N個講法，但其中一個比較主流嘅講法係源至法國更改曆法。原本法國舊有曆法將4月1日定新年，直到時任國王查理九世宣布改用陽曆，將新年重新定為1月1日。當時嘅反對改革派就照樣喺4月1日慶祝，而支持改革派就喺當日舉辦假舉會、送假禮物整蠱守舊派，久而久之就變成法國流行風俗，其後再傳到歐洲各國以及全世界。

其中一個較為出名惡作劇就係BBC喺1957年一則報導，當時BBC宣布多得當年有效控制蟲害，瑞士南部一戶農民大豐收，片入面見到有位女士將意大利粉從樹上「摘」落嚟曬乾。雖然依家睇就知道假新聞，但由於當時無互聯網，BBC又係權威廣播機構，唔少英國人真係信以為真，更打電話到BBC問點樣種「意粉樹」。

事相隔多年後BBC又同大家開玩笑，喺2008年播出一段偽記錄片，講述南極企鵝為咗過冬而「飛」去南美洲，以當時技術嚟講，CG的確做得幾真下，不過今次就唔多人上當，反而覺得呢個惡作劇幾有趣。

除咗權威廣放機構外，Google亦會每年整蠱大家應節。當中較出名莫過於2013年推出氣味搜尋功能，用家能夠喺Google搜尋各種氣味，再用喇叭「播出」。不過Google上年同今年就話基於疫情嚴峻，出於尊重所有對抗疫情嘅人，就唔同大家開玩笑。

資料來源：Encyclopædia Britannica