近年Youtube出現唔少不露面但露身材嘅YouTuber，無論彈鋼琴、砌高達、煮野食定係畫畫，各種題材應有盡有。最近日本亦有位YouTuber以同樣方式走紅，影住自己邊跑步，重要部份邊晃動，引嚟唔少網友關注。點知佢最近自爆真實身分，坦言自己係一位37歲失業人夫，大談背後苦衷，唔少網友都後悔自己J錯人，退訂以表不滿。所以話，網絡世界真係唔可信，分分鐘你心目中嘅「女神」，真實身份係一個阿叔。

日本YouTuber「千春（むね肉ちはる）」自上年12起開始做Youtuber，一開始「跳繩挑戰」走紅，條片重點緊係唔係佢跳得有幾快同幾耐，而係不停跟住晃動嘅上圍，就算睇唔到樣，條片都吸引到接近6萬觀看次數。其後千春就開始拍各種運動片凸顯佢嘅「長處」，個Channel開咗幾個月就突破2萬訂閱。

（圖片截自：Youtube@むね肉ちはる）

點知佢喺上禮拜出咗條新片，更註明「炎上覺悟」（即係預咗會引起爭議），公開自己真實身份。坦言前公司因為「共渡時艱 」而減佢人工，加上愛犬患癌所以劈炮唔撈，轉行做Youtuber，瞞著老婆男扮女裝拍片。本來只係打算多一份收入，點知啲片瞬間爆紅，基於罪惡感自責而決定公布真相。

真相曝光後，千春大方分享自己「變裝」過程，然而大部粉絲覺得被騙而集體退訂。不過仍然有部份粉絲表示理解千春苦衷，並欣賞佢嘅誠實。

資料來源：Youtube@むね肉ちはる