弧形設計嘅可樂玻璃樽陪伴香港人近半世紀，雖然歷年嚟曾多次改版，越改就越細支，但仍保留經典弧形曲線造型。最近太古可口可樂突然宣布，公司旗下玻璃樽將從年中開始「休假」，暫別大家一段時間，並於出年以全新面貌示人。新設計將會加入更多環保元素，可回收重用之餘，亦包含再生玻璃物料，樽身將會更輕量。

自1965年開始，香港太古可口可樂所生產嘅玻璃樽汽水，風雨不改地陪伴香港人。無論玻璃樽裝「可口可樂」、「雪碧」、「芬達」定係「玉泉忌廉」，都盛裝過大家唔少經典回憶，可能係你第一次默書拎100分嘅片段；又可能係你第一次同屋企人去大排檔食飯嘅片段。今次宣布停產，代表又有一個具標誌性嘅集體回憶走入歷史。

臨別在即，「可口可樂」特別邀請近年屢獲國際攝影獎、90後風景攝影師Kelvin Yuen影相留念，記錄大家同玻璃樽嘅多個共同時刻。

可口可樂表示，雖然包括「可口可樂」在內嘅玻璃樽裝汽氣將會暫別大家一段時間，但罐裝同膠樽裝產品將會如常生產，為大家隨時效勞。雖然未知新設計會否沿用經典弧形設計，但各位可樂愛好者最好就買返幾支玻璃樽可樂好好收藏。