Cosplay可以話係一樣相當花時間同金錢嘅興趣，每次演出背後必需投入大量時間、金錢、體力、熱情去研究及製作人物服飾。當唔少後生仔都玩到心力交瘁嗰陣，日本就有位伯伯喺60歲初嘗Cosplay後，發現人生新樂趣。

（圖片截自：ねとらぼ）

今年71歲嘅河口知明先生，10年前喺廣島Cosquerade主辦嘅cosplay活動，首次以《龍珠》龜仙人造型出場，就成為網絡一時佳話，佢亦從而展開Cosplay之路。其後佢亦活動自己「年齡優勢」演活過唔少著名角色，例如《進擊的巨人》嘅皮克西斯司令、《JOJO的奇妙冒險》嘅祖瑟夫・祖士逹、《火影忍者》嘅第三代火影猿飛日斬等等。

河口先生原本係一間製衣公司嘅老闆，經營製衣生意已經超過40年，本身興趣係玩經典汽車同經典電單車，自接觸Cosplay後就久久不能自拔，漸漸淡出公司決策。除咗Cosplay以外，佢更做埋Cosquerade主辦者，利用其年齡及經驗，成為地方公共團體及企業之間橋樑，安排公共設施及文化財產活動盡獻己力。另多，更同流行文化活動「ポップカルチャーひろしま（流行文化廣島）」合作，邀請國外Cosplayer到廣島一邊擴興城市，一邊向世界輸出日本流行文化。

（圖片截自：ねとらぼ）

河口先生表示，出國旅行嗰陣，當人哋提到廣島，只會諗起原子彈同埋和平，希望可以藉此向世界推擴更多廣島文化，所以就有主辦Cosplay活動嘅諗法。

（圖片截自：ねとらぼ）

被問到點解咁著迷於Cosplay，佢坦言表示享受受歡迎嘅感覺，更話有次去做白內障手術，個護士問佢「你係咪龜仙人？」，先發現自己原來好受男女老少歡迎，帶畀佢更多能量。

（圖片截自：ねとらぼ）

老套啲講句，河口先生嘅經歷，似乎話比大家知心境年齡比身體年齡更重要，只要願意嘗試新事物，就可能從中發掘人生新樂趣。另外，佢熱心運用自身優勢將Cosplay發揚光大，利人利己精神確實值得欣賞同尊重。