本身係黃色，因為耳仔被老鼠咬甩（另有版本講飲錯悲劇口服液），而喊到變咗藍色嘅多啦A夢，依家又因為環保而變成綠色。最近日本服裝品牌UNIQLO宣布經典卡通人物多啦A夢擔任全球可持續發展大使，為響應環保，將大家熟悉嘅藍色機械貓色變成綠色，品牌LOGO亦同步轉為綠色，象徵開啟「多啦A夢可持續發展模式」（Doraemon Sustainability Mode），將可持續發展理念推廣至全世界。

相信大家衣櫃入面應該總有幾件（或者全部都係）UNIQLO，貴為全球市值最大嘅快時尚品牌，近年積極推廣環保。佢哋之前就推出過「Re.Uniqlo」計劃，回收舊有大褸再透過特別技術提取入面嘅羽絨，再經過加工同清洗，製作出全新羽絨褸。

為咗將環保理念宣揚開去，最近佢哋就搵埋多啦A夢做全球可持續發展大使，仲將佢變埋做綠色。綠色多啦A夢將會同LifeWear品牌代言人綾瀨遙，以及其他UNIQLO全球品牌大使，共同推廣可持續發展活動。據了解，佢哋第一步將會從日本中小學入手，用可愛嘅綠色哆啦A夢推廣可持續教育。