重覆性相當高嘅倉庫工作確實會令人煩厭，Amazon為咗緩解工人壓力，早前就推出「FC Games」計劃。簡單嚟講就係將倉庫工作遊戲化，員工只要按照任務將貨物搬運到目的地，就可以獲得積分，從而贏得遊戲機、Apple Watch等禮品。

據外媒The Verge報導，Amazon從2019開始就推出呢個計劃，最近有意進一步擴展到全美至少20個州嘅倉庫。計劃設有高達6種小遊戲，例如有一款叫做「MissionRacer」嘅遊戲，要求員工將貨物分配到貨車上指定嘅籃，從而獲得積分。

經典遊戲倉庫番。

積分可以換成Amazon專用貨幣「Swag bucks」，用嚟換購T-shirt、水樽等禮品。如果員工喺旺季期間表現良好，更可贏取遊戲機及Apple Watch。另外，有部份遊戲會列出全國排行榜，員工可以睇到自己嘅表現有幾勁，促進同事之間良性競爭。

《Black Mirror》第一季第二集「15 Million Merits」。

不過就唔係每個員工都鍾意呢種遊戲化工作模式，有員工覺得咁樣好似科幻劇集《Black Mirror》第一季「15 Million Merits」嘅情節，入面嘅人透過踩單車機獲得代幣，同樣可以換領各種禮品、同其他人競爭。擔心公司會用遊戲競爭手段不知不覺間剝削員工。事實上，呢項計劃並非強制性，員工可以自由選擇玩唔玩，又唔係好似佢講到咁恐怖嘅。

資料來源：theverge