本地藝術家迪嘉繼上次《潮流 - Guan 關》後，再同香港潮流玩具品牌ZCWO合作，推出《潮流》系列第二彈「飛 Fei」。咁「潮」嘅張飛Figure你又見過未？

上次聯乘作品《潮流 - Guan 關》。

香港本地藝術家迪嘉擅長以流行文化融入華人文化經典人物，曾經就試過將《龍珠》嘅人物套入《西遊記》入面，重新詮釋大家心目中嘅經典人物。佢上年就同香港潮流玩具品牌ZCWO合作，推出《潮流》系列Figure，上年就玩咗《三國演義》入面嘅關羽，今次就輪到張飛。

今次嘅《潮流 - Fei 飛》同樣以Vinyl Art風格呈現，約55cm高嘅Figure重現張飛粗獷剛烈形象，同時融合當今潮流元素，著住連帽衛衣再笠件羽絨，加埋條束腳jogger pants，「玩味」十分重。

呢位「潮叔」張飛，身上嘅連帽衛衣刻有老虎下山圖案，一手揸住丈八蛇矛，另一隻手揸住酒樽，好似一言不合就會即刻開你拖，著住潮衫得嚟仍然不失霸氣。

個人覺得最有趣嘅地方係對鞋，竟然係依家相當之興嘅「分趾鞋」，呢個張飛果然好「潮」。目前官網已開放預訂，預計5月出貨，價格為HK$2,800。

資料來源：zcwo