近年華為遭到美國政府封殺，手機業務大受打擊，繼而轉戰到其他領域發展，例如將5G技術應用到養豬挖礦。據外媒《Bloomberg》報導，華為再開拓新財路，正打算從2021年開始向Apple及Samsung等手機商收取5G專利費，每部手機專利費上限為2.5美元。

根據華為尋日發布嘅《創新和知識產權白皮書2020》顯示，截止2020年底，華為喺全球持有超過10萬件有效授權專利，當中90%以上專利為發明專利。即使美國全力「封殺」，現時華為仍然擁有最多5G專利組合，並打算藉此換取「合理」報酬，同時承諾自己專利費會比其他5G技術公司更低，例如Qualcomm、Ericsson以Nokia。

早幾年前Apple就因為專利費問題同Qualcomm鬧上法庭。

另外，華為高層亦表示，公司喺2019年至2021年期間收取約12-13億美元專利費，但無具體講明當中有幾多嚟自5G專利。不過華為智慧財產權部部長丁建就表示，每部手機專利費上限為2.5美元。

現時全球邁進5G時代，除咗手機以外，汽車、家電、電子商務都開始應用到5G技術。雖然華為喺手機領域暫時被人「打殘」咗，但手持著嘅5G專利或者可以令佢地持續營運落去。

資料來源：Bloomberg、華為