人愈大，就愈少時間同心力去Pick up一隻新Game去玩，有時放工後情願開Netflix或Youtube睇下片就算。舊時啲「戰友」搵食嘅就去搵食，湊仔嘅就去湊仔，莫講過一齊打返鋪機，就連約出嚟食個飯都約咗成年。最近發現經典遊戲炸彈人新作《超級炸彈人R Online》即將免費登陸各平台，無論用PS、XBOX、Switch定係電腦都可以一齊連機玩，不如叫返昔日啲戰友玩返鋪？

最近KONAMI宣布《超級炸彈人R Online》將於2021年內登錄各平台（Nintendo Switch、PS4/5、Xbox One、Xbox Series X/S、Steam），大家到時可以免費下載，並且可以跨平台連線對戰。

今次除咗保留「炸彈人」傳統玩法之外，更加入支援跨平台連機嘅64人大亂鬥模式，就好似「食雞」咁，64對個人互炸，留低嘅就係贏家。另外仲有最多可以16人一齊玩嘅「標準」對戰模式，以及最多3 vs 3組隊對戰「錦標賽」模式。

「炸彈人」節奏快得嚟又休閒，趁老婆去買餸嗰陣偷打幾鋪都唔會察覺，不妨等隻Game出嗰陣約埋班朋友玩返幾鋪。