最近卡式錄音帶之父Lou Ottens離世，令人再次憶起那些年用Cassette帶/CD聽歌的日子，隨著時代變遷，大部份人轉用音樂串流平台聽歌，莫講話Cassette帶絕跡，就連CD都危危乎。

（圖片截至：statista）

據美國唱片業協會（RIAA）最新數據顯示，美國CD銷量自2000年到達頂峰後，其後逐年下跌，上年更只賣出3,160萬張CD專輯，對比2000年頂峰時期足足下跌97%。

好多後生都唔知呢嚿咩嚟。

無他嘅，自從MP3機出現，加上智能手機普及，除咗發燒友或忠實樂迷會買CD，普遍都係聽電子檔。加上近年手機上網費用愈嚟愈平，速度亦從3G變成4G，更甚至5G，Spotify、Apple Music、Tidal等音樂串流平台湧現，徹底改變大家聽習慣。無咩人咁神心買隻CD返去rip碟再入落DAP或手機聽，更何況依家啲DAP都支援音樂串流平台，又有Tidal呢啲無損音樂串流平台，無論發燒友定係普通用家都各有選擇。

（圖片截至：statista）

從另外一則統計顯示，喺2020年，音樂串流平台為美國音樂行業帶嚟122億美金收入，佔83%，而CD個比例已經細到差唔多見唔到，反而一向小眾嘅黑膠碟（綠色個行）有上升趨勢。可以見到過去20年大家聽歌嘅習慣從CD過渡到Download，再到現時嘅音樂串流平台。

資料來源：statista