電商巨頭阿里巴巴上年年底遭中國監管機構調查，其創辦人馬雲更「潛水」約2個月。近日華爾街日報引述消息指，相關機構正打算對阿里巴巴開出巨額罰款，金額將超過9.75億美金，並強迫公司出售實體業務，另外要求阿里巴巴同馬雲割席。

阿里巴巴業務龐大，又有中國Amazon之稱。

報導引述「熟悉北京政府」官員指，儘管螞蟻集團被中國視為危害金融系統隱定，但阿里巴巴同螞蟻集團唔同，係「中國的驕傲」，深受民間及國際投資者歡迎，員工更多達11萬人，所以中國當局唔想強力打壓（crush）阿里巴巴，就算喺調查期間仍要求公司能夠保持運作。

馬雲上次公開露面已經喺一月。

消息人士更表示，馬雲已成公司負累，只要阿里巴巴同浮誇又直言不諱（flashy and outspoken） 嘅馬雲割席，跟隨國家發展路線，就可以得到更溫和對待（softer treatment）。

馬雲面臨「被割」危機。（圖片截至：youtube）

雖然外界一度猜測馬雲因上年10月公開批評中國相關監管而被針對，但報導指其實早於2018年底已經有人暗示馬雲失寵。當時中國國家主席習近平邀請50位企業家開會，當中包括騰訊創辦人馬化騰、百度創辦人李彥宏、小米創辦人雷軍等，唯獨就無邀請馬雲。