各位影音迷，今時今日居然有全新高階藍光碟播放器品牌面世！法國巴黎公司Reavon正式公佈挑戰影音市場，係家庭影院市場推出兩款高階4K藍光播放機UBR-X100以及UBR-X200，難得佢地目標客戶係影音發燒友，公司開宗明義話要填補OPPO過去係影音市場的地位。暫時所見同日系4K藍光機差唔多同樣可播放UHD藍光，藍光碟，3D藍光，DVD甚至SACD及CD。呢刻未掌握背景唔知呢間巴黎公司其實係咪真法國公司定還是係中國醞釀巴黎發佈的世界級品牌。

有人辭官歸故里，有人漏夜趕科場。全新品牌法國Reavon UBR-X100和UBR-X200 藍光機支援杜比全景聲（Dolby Atmos）和DTS：X以及HDR10和Dolby Vision等，實際上機款同技術新意欠奉，兩個型號同樣有兩個HDMI輸出，一個用於視訊一個專用於音訊。感覺將過去OPPO間廠繼續生產推出一個新名的藍光播放機。UBR-X200就音訊上有埋XLR同RCA兩聲道及獨立頻道輸出。

Reavon UBR-X100和UBR-X200將於四月開始供應市場，現時市場上主要的Blu-ray藍光播放機競爭對手有LG，Panasonic及Sony等品牌，當然仲有PS5和Xbox Series X系統全部都可以提供UHD藍光播放支援。咁Reavon有咩特別？暫時只知特別在係呢個艱難時期肯以新品牌名義進入市場，Reavon係德國市場的定價係UBR-X100標價800歐元，而UBR-X200標價1600歐元。暫時Reavon公司只推出呢兩款產品，最大新意就係品牌本身，不過相信係深圳羅湖城成長打滾過的香港影音買家肯定識得保持觀望態度，認真睇清新品牌有咩新意同吸引力。