大家發唔發覺，以前啲電器襟用好多，舊時啲電飯煲、洗衣機、電視等，閒閒地都可以用返十年八載，小弟屋企就有一個用咗10幾年嘅電飯煲。唔知係製造商嘅陰謀，定係新電器多咗電子零件，近年啲電器壽命都相對較短。最尷尬就係用咗4-5年先嚟壞，拎去維修嗰陣發現無零件換，搞到局住要買新。

不過歐盟國家嘅市民之後就無呢啲煩惱啦，據美聯社報導，最近歐盟「Right to repair」法案正式生效，現時製造商喺歐盟27個成員國賣雪櫃、洗衣機、風筒、電視等家電，需提供長達10年保養服務，以減少電子廢物製造，改善環境污染。當然，到時維修費會唔會貴過直接買新就係另一個問題。

根據新規定，新設備必須附送維修手冊，並且要令消費者能夠用普通工具拆解。當發現真係無辦法整返好嗰陣，都可以拆開分類回收，藉此提高回收率。環保主義者當然樂見法案生效，不過佢哋希望法案能進一步擴大到智能手機、筆記本電腦及其他小型電子設備上。