法國輪胎大廠米芝蓮推出全新電動車專用輪胎，聲稱換左佢可令電動車加強續航力60 公里，汽車輪胎原來除左性能同舒適兩種能力之外，仲可以換左輪胎增加續航力，好彩大中華市場一早已經知道「想節能，輪胎能」呢個真理，無比佢嚇親。據講中國製造的 Model Y 將會是係第一款搭載呢種新輪胎的車型。

米芝蓮Pilot Sport 系列輪胎一早就已經係輪胎界大名鼎鼎，最新的EV新系列利用米芝蓮係電動方程式賽車Formula E所得的電動車性能胎經驗主力減低摩擦力，提高抓地力同性能。官方宣稱，佢地收集 6 個賽季的數據整合研究，發展出一種新的技術，稱為 ElectricGrip Compound，呢種特別堅固的複合材質運用在胎紋的中心，能夠承受運動型電動車瞬間大扭力的特性。根據官方測試，一架使用 Pilot Sport 4 SUV 255/45 R19，車重 2,151 公斤的電動車，如果使用 Pilot Sport EV，原本 540 公里的續航力，將能夠增加約 60 公里。

而且除了續航力，電動車專用胎仲需要減低噪音的問題，Pilot Sport EV 運用左聚脂材料的不同排列方式，達成 20% 的噪音抑制效果。Pilot Sport EV 目前已經設計左 11 款原廠輪胎以及 5 款零售胎，尺寸由 18 到 22 吋皆有。當然，能唔能夠真節能同加強續航力要比較過先知，期待有無人會買部Model Y 換條普通輪胎A/B比較下。