「潮流嘅嘢我識條鐵咩?」 呢句說話好多時都啱，因為唔少潮物都係多數用嚟擺多過用。不過今次可能有啲唔同，因為以創新實用為主嘅美國廚具品牌ZOKU就同潮牌Supreme嚟一次Crossover，推出高功能性玻璃內膽水樽，睇得擺得之餘，仲非常實用。

今次呢個水樽，於外觀上繼續大大隻印上「Supreme」之眼，當然方死你睇唔到個牌子咁。而內裡就非常實用，玻璃內膽設計採用硼矽玻璃，玻璃內層比其他材質更加安全穩定，具有耐高溫及耐酸性功能，可以好好咁保持放入當中嘅飲料品質，絕對唔係普通膠水樽可以相比。

唔單止咁，因為水樽以雙層設計，所以就算入面嘅飲品好熱都唔會辣襯手，同時起到保溫及隔熱雙功能。而講到清潔方面，整個水樽多達9個配件，全部都可以拆出黎清洗，呢一點於現時疫情之下非最重要，令你呢個潮牌水樽可以保持高度衛生。

對於ZOKU呢個品牌你可能唔太認識，佢哋係曾經推出快速製冰棒機嘅一個美國新創廚具品牌，而佢哋主張創新，同時保持精緻工藝，令刻板嘅廚房生活變得唔一樣，喺疫情之下長期要留喺屋企煮飯嘅你，嚟一啲新衝擊可能令你更熱愛下廚呢。