2019年Google話要推出遊戲串流平台Stadia，曾一度令遊戲玩家雀躍，可惜去年推出後一直無雷聲無雨點，吸引唔到獨立遊戲開發商，加上大家一度以為Netflix式月費玩法卻發覺唔係個回事，Stadia要求玩家購買遊戲，於是大家都知捱到今日結果Google關閉Stadia內部遊戲開發部門，放棄同PlayStation及Xbox競爭遊戲市場。燒完一大疊銀紙之後以失敗告終，不過Stadia依然存在，唔講你真係唔知，EA將會三月發行推出FIFA 21遊戲，唔知有無人有興趣呢？

據說停止自家遊戲開發部門運作的原因係開發遊戲營運成本太高，單純燒錢。關閉研發遊戲部門唔代表玩完。 Stadia將繼續提供來自其他開發商的遊戲，但唔會再新增Google原先規劃推出的遊戲。Google一年幾前推出Stadia的目的，係想靠全新遊戲串流平台同PlayStation、Xbox等遊戲主機大廠競爭。就概念上串流同傳統遊戲主機不同在於，Stadia可藉由直接從Google伺服器叢集直接傳輸遊戲資料，等玩家可以直接係Android手機或裝有Chromecast應用程式的電視上玩遊戲。

今次關閉Stadia遊戲開發部門的消息，有約150人將會被解雇，位於加拿大滿地可與美國洛杉磯的辦公室將被關閉。對全世界大多數遊戲game迷來講，概念上係失望，實際上係完全無影響！！講完壞消息講個好消息你聽，EA足球遊戲大作FIFA 21將會係3月17日正式係Stadia推出，對於好多買PS5單純只打FIFA的單遊戲玩家，Stadia可能仲有生存價值。