相信大家對《超級機械人大戰》應該唔會陌生，除左一眾大熱機體之外，每隻入面嘅原創機亦係唔少玩家嘅最愛。而日前，適奉《機戰》30周年紀念，Bandai特別將《機戰OG》嘅機體模型化，而被選中嘅第一款機體就係「風之魔裝機神」啦！

對於《機戰》有番咁上下資歷嘅朋友，相信唔會唔識呢部「風之魔裝機神」，佢作為1991年就已經於紅白機上嘅《第二次機械人大戰》登場嘅原創機體，有住白色機身，仲可以變型成鳥型模式，增加移動速度。而當中相信最令人印象深刻嘅，必定係佢招超強四面地圖炮，絕對係一擊清場嘅最佳選擇。

模型方面，除左「風之魔裝機神」機體之外，仲配備埋佢專用嘅「封魔劍」，真係型到爆。而「風之魔裝機神」嘅駕駛者，就係有住綠色頭髮嘅安藤正樹，唔知大家又有無印象呢?