英國著名主持人Jeremy Clarkson、James May及Richard Hammond於2015年轉投Amazon Prime、另起爐灶製作《The Grand Tour》，後來又於2018年宣佈放棄錄影廠 (對佢哋黎講係帳篷啦) 拍攝，專心製作特別篇。而繼上年嘅《The Grand Tour: Seaman》之後，黎緊12月18日就會推出新一集《The Grand Tour: A Massive Hunt》。《BBC》昨日就登出與三位主持及製作人Andy Wilman嘅訪問。

新一集將會講述三位主持人去馬達加斯加，追尋傳說中由18世紀著名海盜La Buse遺下嘅寶藏，而特別篇個名《A Massive Hunt》當然係講緊尋寶，但同時亦有啲似英文粗口「Cunt (女性下身某個部位)」。呢個名同上一個特別篇《Seaman》(諧音Semen，即係精液)有異曲同弓之妙，亦充滿佢哋一貫嘅惡趣味。不過據Andy Wilman指，呢個名其實唔係佢哋改，而係佢哋圍內拗緊邊個名好啲嘅時候，Amazon嘅「Marketing主管」Send Message黎提出，結果瞬間就被採用。

Andy亦透露，佢哋已經於疫情之下，去蘇格蘭拍好下一個特別篇，但蘇格蘭特別篇就只會有60分鐘長，而非慣常嘅90分鐘，播出日期亦未定。

圖片：Amazon Studio

另一方面，隨住三位主持人年紀漸長，亦開始有人擔心呢個節目仲可以玩到幾耐。James May就話，「我依家都50歲後半，都知道自己老咗同可能需要長大，但我覺得我哋都會繼續拍多一陣，因為講真，大家想睇，而令佢哋失望係一件錯嘅事——但總有一日我哋有人會發癲，好有可能係我，我喺呢方面係幾脆弱。」

而據Andy所講，佢哋與Amazon嘅合約仲有兩部特別篇未拍，所以至少短期內大家都仲可以見到三位主持於《The Grand Tour》出現。

圖片：Amazon Studio

如果你仲想睇埋其他訪問，包括Jeremy講下佢對電動車嘅感覺 (特別篇中佢揸咗部Tesla去)、馬達加斯加嘅駕駛體驗，就可以去BBC慢慢睇。