大家仲記得Naughty Dog今年推出、業界人士評價極高，但一出就被Fans們鬧到飛天嘅《The Last of Us Part II》嗎？我唔知有幾多人玩完隻Game之後覺得佢「都唔係咁差啫」 (我直頭係冇買嘅)，但睇返Metacritic玩家評分到依家都係得5.7分，似乎咁諗嘅人就唔多。不過用家唔鍾意還唔鍾意，《The Last of Us Part II》依然於The Game Award 2020中獲得10個提名，成為提名大贏家！

截圖自：thegameawards.com

據The Game Award 2020公佈嘅提名名單，《TLoU2》總共獲得年度遊戲、最佳遊戲指導、最佳遊戲敘事、最佳美術指導等十個提名，成為今年眾遊戲之首，比起廣受好評、Metacritic玩家評分9分嘅《Hades》8項提名 及玩家評分9.2嘅《對馬戰鬼》7項提名都仲要多。以上三款遊戲都入圍年度遊戲提名，另外三款入圍遊戲就係《動物之森》、《Final Fantasy VII Remake》及《Doom Eternal》。

特別值得一提嘅係，The Game Award雖然號稱係玩家票選，但提名名單其實係由95個遊戲媒體組成嘅評審團選出，玩家投票亦只係佔最後得獎票數嘅10%，換言之實際上都係由班評審團決定邊個得獎。再睇返《TLoU2》嘅媒體評分有93…睇黎佢最後拎埋年度遊戲都唔出奇。

The Game Award將於12月10日以線上形式舉行。