我近排成日同大家講院線生意大受疲情衝擊，又停業又執又盛，但講嘅大多係歐美院線，大家未必熟悉，感覺自然冇咁深。但今次唔同啦，今次係香港都有戲院、目前全球最大院線 (沒有「之一」) AMC走出黎同大家講，我唔掂啦，我最多捱到年頭架咋！可想而知院線營運有幾咁困難。

太古廣場AMC

AMC日前發出公告，詳細地說明目前佢哋於美國有開門做生意嘅598間戲院中，有494間嘅入場人數比正常少85%以上，而紐約、洛杉磯等大城市戲院更加因為防疫措施而未能重開。就算有開，於人流限制及冇戲好上嘅雙重打擊之下，入場人數都唔多得去邊，所以目前AMC係蝕住錢地營運戲院，所以除非突然有好多人入場睇戲，唔係嘅話按目前呢個蝕錢嘅速度，最快2020年尾或2021年頭，AMC就會用哂手頭上嘅現金。目前急需增加現金流嘅方法。

AMC提到幾個可行辦法，包括增加新嘅借貨 (但據報佢已經揹緊條大數喺身)、進行供股、發股等股本融資、叫業主減租、出售戲院或其他資產，甚至尋求其他公司進行合資。但目前嘅難度在於AMC唔知自己要搵到幾多錢返黎先至係安全，事關上面「捱到年尾」條數，係用依家嘅院線經營環境計出黎，假若情況有變——於歐美疫情持續嘅情況下咩都有可能變——需要嘅錢自然就會唔同。