琴日先同大家報導過，因為疫情重挫電影業，美國院線Regal Cinemas宣佈暫停營業直至另行通知，轉個頭就已經有另一大型院線、英國嘅Odeon宣佈類似嘅策略。用停業黎降低成本。

據《Deadline》報導，英國大型院線Odeon於昨日向顧客發送電郵，講及最新嘅營業安排，旗下128間英國戲院，有大約四份一會要本星期起只於週末營業，亦即星期一至五停業。據知是次安排與Regal Cinema母公司、英國Cineworld早前宣佈旗下英國及美國戲院暫停營業一樣，都係由於原定11月上映嘅007系列最新作《No Time To Die》決定延期到下年4月上映。

《Deadline》指，Odeon於向顧客發送嘅電郵中話，只要「大片回歸」，戲院就會全面重開。某程度亦再次印證電影目前面對嘅惡性循環。