美國嘅著名結他及耳機品牌Fender推出新款與別不同的真無線耳機Fender TOUR居然一出就賣斷市 。當人人都倒模ANC主動式降噪耳機，市場上全部無差異時，Fender做回自己專長，舞台式全無線入耳鑑聽耳機，唔駛用ANC，舞台歌者從來都係貼耳隔聲，以人體工學做出 NRR -20dB 噪音阻隔，好過好多一般ANC耳機。加上多年鑑聽級耳機及調音經驗，可謂近期最「聲、色、味」俱全的無線耳機，個人認為係2020年無線耳機的"Game changer"！

Fender過去做開結他，慢慢漸變成一個專做靚聲耳機的音響品牌，收購咗著名耳機廠商Aurisonics之後，更加係IEM(In-Ear Monitor)耳機的專家，所生產的入耳式鑑聽耳機具有攝人的魅力。如果你玩開Fender耳機，肯定就係HIGHEND級耳機玩家。到今年10月，Fender首次推出無線耳機，你以為無線肯定係聲音同功能的妥協品？錯！Fender一係唔出，一出果然係各個方面都做到極高水準，個人認為係AAA+級出品，要樣有樣，要聲有聲，隔音出色連個充電盒都品味過人，超級驚喜。

首先講樣Fender TOUR外殼採用 3D 打印技術製作，以龐大數據庫及人體工學設計出貼耳的外殼，做出 NRR -20dB 噪音阻隔，營造出最好的環境隔音表現，以及舒適的佩戴效果。我覺得呢點出色之處在於唔駛去買公版的ANC晶片，可以用另一種方式去呈現新耳機。面板係相當之Fender以及有訂制耳機的感覺，以多重閃粉塗層製作，透出有如夜空中星光一樣的質感。耳機上仲有壓花 Fender 標誌，由人手上色，係美觀與功能兼備的產品。

Fender TOUR 採用藍牙 5.0 支援 aptX™、SBC ,AAC等高質音效編碼傳輸。耳機使用 7mm 定制動圈單元，設計專門強化音質，有特製內箱結構，加上低通濾波器設計，可以減低高頻反射，加強高頻的清晰度。同時，單元的後方亦加入獨立腔體，可以增強低音表現之餘，又不影響到中高音的細緻，無論人聲還是樂器都有清晰表現。開機、連接、關機，都有招牌式結他提示音，唔重要但貼心有趣，值得一讚。

如果你問我缺點，個人認為唯一缺點係 TOUR 連續5 小時的播放電量，好像唔多夠喉，不過為左耳仔健康，聽足五個鐘休息一下對自己係好少少。當然而家所有耳機都有充電盒，Fender經典結他盒造型充電盒可以提供 22 小時續航，即使快充 15 分鐘就已經有 1 小時電量。至於無線耳機最令人擔心的一樣野，講電話語音通話質素方面，TOUR 內置雙咪降噪設計配合高靈敏度收音咪及貼片陶瓷天線，令訊號更穩定及減低斷線情況，大大提高語音通語質素。

一個星級的品牌肯定跟一個設計精良好用的應用程式方便用家調控，Fender 都有一個專屬《Fender TOUR》應用程式，同時支援  iOS 或 Android 平台。可以為耳機內的 DSP 選擇預設音場，甚至自行設定屬於自己的聲音調校，自定EQ配置。用落相當方便。總括而言，從方方面面睇呢個耳機都真係非常吸引，係近半年最值得人期待同擁有的真無線耳機，所以我真心認為佢係屬於Game changer級別，市場似乎都認同我的見解！

Fender TOUR 規格

藍牙：5.0

解碼：aptX™、SBC, AAC

單元：7mm 定制動圈

靈敏度：110 ±3 dB（1 kHz） 

頻率範圍：20Hz-20kHz

有效範圍：10 米

防水等級：IPX4

播放時間：約 5 小時（配合充電盒可作約 22 小時播放）

充電時間：約 2 小時（快充 15 分鐘，約 1 小時播放）

售價：HK$1699（10 月 1 日正式發售）