日本Sony於週日邀請咗多間日本遊戲傳媒親身試玩PS5，同時亦係PS5首之實機現身，除咗可以睇到PS5主機個樣之外，生活於寸土尺金嘅香港，大家可能非常關心PS5究竟有幾大部！

圖片：《Fami通》

《Fami通》嘅報導中，就有幾張相展示咗空立擺放嘅PS5、電視、以及玩家嘅比例，睇落去雖然幾高身，但打直放嘅話「佔地」又唔算太多。而《4gamer》就有更加仔細嘅8K機身圖片，當中亦有分析PS5嘅散熱效能，據報就係 (打直放時) 上方吸氣，後方排氣，但遊玩過程中唔覺得風扇特別嘈，亦唔覺得吹出黎嘅風特別熱，似乎早幾代都有嘅散熱問題有所改善，但就特別提到要預留後方空間作排氣而用。

圖片：《4gamer》

另外《4gamer》亦展示PS5直放與橫放嘅圖片，值得留意嘅橫放似乎係必須加購底座，如果唔係部機應該係會放唔穩。同時佢哋亦展示咗新「DualSense」手掣，指雖然個樣睇落同Dual Shock 4有唔同、亦未公開具體大小，但揸落嘅感覺、按鈕佈局同Dual Shock 4又非常相似。唯一唔似，亦係好多媒體琴日已經報導過嘅，就係PS5所有Game都會用「X」掣做「確定」，亦即係跟PS4美版遊戲嘅慣例。

圖片：《4gamer》

如果大家想睇真啲PS5嘅模樣，可以去返《Fami通》及《4gamer》嘅網站慢慢睇。