相信唔少人都有睇Youtube嘅習慣，亦或多或少有聽過近年嘅「黃標事件」，背後其實都係針對Youtube審查影片所使用嘅AI演算法所產生嘅質疑。而Youtube近日就提出會進一步使用AI審查影片，並將更多影片列入「年齡限制」，對觀眾黎講，就係未來可能有好多片都要大家先登入、核實年齡之後先可以睇。

截圖自Youtube

Youtube日前於官方Blog上公佈，未來會使用AI演算法，為更多影片加上年齡限制，觀眾要先登入或提供額外資料核實年齡，先可以睇到呢啲被加上年齡限制嘅影片，目的係回應各國家長組織指Youtube有太多小童不宜嘅內容，希望締造一個更加「合家歡」嘅環境，亦留住針對「合家歡」市場嘅廣告商。

新演算法最令人擔心嘅，就係會唔會引發新一輪「黃標事件」。所謂「黃標」，其實係指不符合Youtube規範，而被Youtube禁止分得廣告利益嘅警告。而根據Youtube規範，影片中含不當言語、暴力、成人、仇恨、爭議性話題和敏感事件等內容嘅影片，都會被打上黃標，創作者亦會失去廣告分成。問題係Youtube秒秒鐘多幾百條片，用人逐條睇肯定唔Work，所以大部份工作其實係靠AI演算法處理。

問題就出在呢個AI演算法近年一直都被指極為嚴格而且經常出錯。例如動作遊戲內嘅戰鬥場面如果太密集都有可以被列為「暴力內容」，講粗口就算消音，甚至明明唔係講粗口，只係用咗消音呢個效果都會被列為「不當言語」，更加唔好話啲有關示威、肺炎嘅社會新聞被列為「爭議性話題和敏感事件」。雖然可以透過提出反對，令Youtube以人手重新審視影片內容，但一來未必次次成功，二來就算成功，條片頭幾日嘅所有流量 (很多時亦即係大部份流量) 都唔會計錢，大大影響創作者嘅收入來源。

有關早前黃標事件，可以睇Youtuber Psyman嘅分析

所以，即使Youtube話會被新AI加上年齡限制嘅影片，大多數都已經被「黃標」，所以新演算法唔會對創作者造成任何新影響，但唔少人都預咗推出初期新AI會殺錯一大堆良民，黃標事件可能又再重現。