隨住PS5同Xbox Series X推出，次世代主機大戰即將開……呃…OK，以香港人嘅習慣黎講，Xbox就應該唔太會威脅到PS5嘅地位，不過下年就唔同講法啦，因為據《Bloomberg》報導，任天堂將於明年初推出升級Switch，到時就真係荷包大戰啦！

據《Bloomberg》引述不願表明身份嘅知情人士所講，任天堂預計推出嘅升級版Switch會「有更強運算機能，以及支援4K高清圖像，而推出新機嘅同時，任天堂亦會推出數隻「分別針對輕玩家以遊戲迷」嘅大作以助銷情。換言之，今年年尾任天堂會有較少動靜。

Switch自2017年推出以來，基本上冇作出過任何機能提升，即使2019年更新硬體都只係解決續航力問題，所以如果消息屬實，將會係Switch推出以來首之機能升級。但大家更關心嘅，或者係任天堂生產線究竟跟唔跟得上銷情，事關香港Switch主機價錢長炒長有，遇著《動物森友會》及《Ring Fit》等大作推出更係一機難求。