依家冇街出，同朋友見面好多時都係你去佢屋企或者佢去你屋企，咁幾條友坐喺個廳到有咩好做？緊係開檯打牌啦！但普通麻雀好似又太過「娘」，唔適合你咁生活品味嘅男士？咁你就要睇下由台灣設計、台灣製造嘅「馬丘Machill極簡麻雀」啦！

麻雀嘅設計咁多年黎 (至少係我識打牌嘅十幾廿年黎) 都冇咩點變過，大不了就係個牌背唔同色、大隻啲細隻啲咁。而「馬丘Machill」嘅設計團隊「The 90s Lab」於2012年大學Final Project時就已經以極簡風格重新設計麻雀、籌碼、牌尺及麻雀檯櫈，仲拎埋德國紅點設計獎，但後來卻因為種種原因冇辦法商品化，直到近年先重新計畫，並準備於台灣眾籌平台「嘖嘖」上推出。

圖片：The 90s Lab Via ShoppingDesign

與傳統麻雀相比，「馬丘Machill」改以純白為主色，牌背可以選擇白色或黑色。形狀亦較為方正，方使企穩，材料亦較非傳統嘅「油光滿面」，而係稍為啞色。佢哋亦重新設計麻雀嘅字型圖案，例如萬宇及番字嘅字體改用有傳統楷書味道嘅修長宋體，筒子亦改成單個圓圈，一索隻雀就更加係大幅簡化。另外亦會於傳統嘅紅綠配色之外，推出藍灰色版本，令簡約感進一步提升。

至於台灣比較常用嘅牌尺就加入刻度，方面知道牌棟嘅數目。

圖片：The 90s Lab Via ShoppingDesign

「馬丘Machill」預計會於9月正式登上「嘖嘖」集資，目前就收集緊大家嘅意見，以決定最後單案及推出邊啲週邊產品。有興趣嘅大家可以去畀下意見。並留意「馬丘Machill」嘅官方Facebook。

馬丘Machill on Facebook