Sony正式推出全新無線降噪耳機WH-1000XM4，作為第四代降噪耳機外觀上雖然無大變動，但實際應用同功能上大有進步，我有幸實試一週個人認為係現時無線降噪耳機市場中最好選擇，現代人睇片睇文都要快，我簡單歸納好處係1.極致寧靜降噪為本最強。2.Speak to Chat好用智能用家一開聲就自動停音樂變環境聲對話。3.講電話通話機能超強高清晰。4智慧功能性無敵。最後我想加埋聲音播放質素屬於無線降噪耳機最佳之一但我忽然間諗起如果你係以純音質作為首選，唔需要入降噪耳機類別，降噪耳機就係功能先行時刻「幫緊你」！

Sony的無線降噪耳機向來係市場上Top3之選，上代的降噪功能已經係好強大，新呢款第四代雖然使用的降噪晶片係一樣，但程式演算法改進都加強左佢降噪的機能，尢其有利於過濾高頻噪音。如果你未玩過Sony無線降噪耳機，強烈建議你去試用一下，好多人第一次試用對於啟動noise-cancelling後一下子寧靜世界感到驚訝，呢個實際上正正係降噪耳機存在的價值同意義，所以先一代接一代，間間廠都想開發無線降噪耳機，實際上Sony係呢方面即使唔係第一都絕對座亞望冠。而加上新智能功能協助， 暫時我認為係最好！

智能係呢個耳機功能性最無敵的地方，由於我無睇簡介同說明書就直接戴出街試，當我同人講野時真係非常驚喜，耳機感應到我講野會自動停音樂週圍環境聲放大，耳機聽到自己同別人的聲音，毋需任何動作，當然依然可以右手按耳機啟動環境聲，而且講完野又會自動播返音樂 Amazing。Sony叫呢個做Speak to Chat 功能！WH-1000XM4有DSEE Extreme 音樂升頻技術，利用Edge-AI（人工智能），準確修復係數碼壓縮過程中流失的音訊，體驗更擬真聲音。Edge-AI可實時分析音效，並識別樂器、音樂類型和每首歌曲的獨特元素，有效修復係壓縮時流失的高頻音訊，聽歌音質更進一步。而且呢一代開DSEE Extreme可同時開設定等化器，不過呢個就我個人而言無咩用。我應用無線降噪耳機主要不為聽歌只為播Youtube、收音機、睇戲通勤出街用， 簡單用tidal HiFi串流播放實試係好聲過現時的Bose降噪耳機，三頻強勁人聲凝聚，通清有立體感，不過想玩音響我選擇大機，想聽歌我唔會用降噪耳機類型耳機。

值得一提，對我來講藍芽耳機其中一個最重要任務係隨時「講電話」，過去好多耳機通話能力偏低一行出街嘈雜環境，對方完全聽唔到你講咩。不過近期新出的耳機係呢方面都全面改善中，WH-1000XM4呢方面好利害又一次讓我感動，個人講野聲音會微微耳機中放大，智能收音強勁對方非常清晰聽到對話，而且從尖沙咀行遍彌敦道通行油尖旺再轉落地底地下鐵通話依然穩如「揸住個電話講」。睇返廠方介紹因為佢採用左全新Precise Voice Pickup技術，有效控制耳機內五個麥克風及有先進音頻訊號處理，可以更清晰和準確地收集聲音。耳機的總體智能運用得好好，自動偵測行路、座下、通勤等唔同模式精準自動而唔會感到1秒頓挫感有煩人電腦聲重覆，通勤模式、行動模式等煩住哂！而耳機內置感應器，當你一除低耳機，就會自動停播放，慳電便捷。

WH-1000XM4的佩戴舒適度幾好，雖然香港大熱天時行街戴住有少少侷促，但非戰之罪。電池續航力長達30小時，確實試足一整日完全無問題，如果有冷氣直情忘卻耳機的存在直到我開口講野！老實講佢用咩降噪晶片藍芽晶片我無興趣知，實體體驗最緊要，試用一週完全無投訴，當然所有硬件都係最先進，值得一提係Sony個軟件Sony Headphones Connect應用程式配合無論連接、設定、調聲、功能都非常方便好用，簡單清楚。講得太多讚賞要搵位入佢缺點我覺得都只能講最老土的野，價錢港幣2,890蚊係有少少貴，顏色得鉑銀色和黑色兩種係唔夠多元，而佢外觀同第三代完全一樣亦都係唔夠有新鮮感！如果我需要無線降噪耳機，上面雖然有咁多缺點，我都會買WH-1000XM4，呢次試用最大感動係我搵到暫時最好的降噪耳機，最失望係寫咁多字係一蚊都無收過！